Luan Baçi nxjerr “zbuluar” Enkelejd Alibeajn

Kreu i degës së Partisë Demokratike në Fier, Luan Baçi, ka komentuar deklaratën e mbrëmshme të Enkelejd Alibeajt në lidhje me kandidatët për zgjedhjet e 14 majit.





Sipas tij vizita e djeshme e Alibeajt në Fier, ishte më shumë një “show” televiziv, pasi ai ende mban peng zyrat e PD-së në Fier, të cilat janë ndërtuar me mjetet e demokratëve.

“Sa për të komentuar takimin, vizitën e Alibeajt në Fier, dje e mora vesh dhe unë, në fillim thanë që ka një mbledhje me kryesinë e degës, isha i habitur sepse në Fier nuk ka ndonjë anëtar të Kryesisë që të shkojë pas Alibeajt.





Pastaj mora vesh në rrjetet sociale, pashë disa foto, pashë që ishte një takim me disa nga ish-drejtuesit e degëve dhe disa deputetë aktualë të PD-së në Fier. Ishte një takim miks, një ‘show’ televiziv që bën Alibeaj duke vajtur në ato degë ku janë akoma të uzurpuara zyrat e PD-së. Nuk i kuptoj si nuk i vjen rëndë, duke mbajtur zyrat e PD-së në Fier të bllokuara me çelës.

Ato zyra janë ndërtuar me kontribute vullnetare, janë financa të anëtarëve të PD-së, dega Fier, të hedhura që nga fillimi deri në fund, pasi kanë qenë jashtë përdorimit, dhe t’i uzurposh ato zyra kur demokratët e Fierit, mblidhen në ambiente private duke paguar qira për të bërë mbledhje, dhe Alibeaj i mban zyrat e bllokuara, duke mbajtur një garanci nga policia e Ramës, dhe i përdor një herë në 6 muaj për të bërë ‘show’ televiziv, për këtë më vjen keq shumë”, ka thënë Baçi

Për Baçin, deklaratat e Alibeajt se do të ketë dalje me dy kandidatë që pretendojnë se përfaqësojnë Partinë Demokratike për zgjedhjet vendore, janë të papranueshme.

“Dje Alibeaj doli me deklaratë se po përpiqet që të gjejë kandidaturat për kryetarë bashkie, pra për të bërë diversion, dhe për t’ua kundërvënë demokratëve kandidatura përballë për të dëmtuar PD-në.

Dihet tashmë që në të gjitha degët e vendit, po kështu edhe në Fier, është hapur gara e kandidatëve për propozimet dhe vet propozimet për kandidaturat për kryetar bashkie në procesin e primareve. Por, duket se këta e kanë përvojën e 6 marsit, për të emëruar disa kandidatë thjesht për të bërë ‘show’ televiziv, dhe për t’ia kundërvënë PD-së, dhe për të lehtësuar fitoren e Ramës në çdo bashki, për të përjetësuar pushtetin e Ramës.





Kjo është më se e dukshme, por mendoj se nuk do të ketë kandidat që do të pranojë t’u kundërvihet anëtarëve të PD-së në çdo bashki, mos bëhet fjalë pastaj për komisioner apo vëzhgues, ata e dinë vetë atë pjesë që s’i marrin dot, por vazhdojnë të bëjnë lojën e pistë në bashkëpunim me Ramën për të dhënë një mesazh te qytetarët se demokratët shqiptarë se PD-ja është e përçarë, gjë që nuk është aspak e vërtetë.





PD në bazën, me anëtarët e saj, simpatizuesit, votuesit e saj janë në unison dhe do të marrin pjesë në primare për të përzgjedhur kandidaturat.





Kështu që cilido kandidat që do të emërohet nga Alibeaj apo Basha, thjesht do të jetë një diversion për demokratët, i papranueshëm për demokratët, dhe nuk do të pritet hiç mirë nga ta dhe qytetarët”, është shprehur më tej Baçi.